عن الشماته والزيطه

قبضوا علي بديع ، قبضوا علي المرشد ، قبضوا علي ابن الكلب وتعمل شير للصوره وهو بالجلبايه وتقعد تهلل وتفرح وتشتم فيه شويه وبعدين تروح قايل اللهم لا شماته.! ،،،

حقيقي مش فاهم وجهه نظرك ماهو ياما اللهم لاشماته وتقعد ساكت ، ياما تزيط وانا عن نفسي بحب الزيطه. 

وفي وسط الزيطه والفرحه تلاقي واحد فلوطه طلعلك ويقولك حرام يتصور كدا وحقوق الانسان وارحموا عزيز قوم ذل - علي اعتبار ان المرشد عزيز - ،،، 

ويفضل بقي -هذا الفلوطه- يرغي ويهري ويصر وياكد انك معندكش دم وان انسانيك اتعدمت وكلام كبير اوي ، مع ان هذا الفلوطه كان ايام القبض علي حسني وجمال وعلاء وصفوت الشريف واحمد نظيف واحمد عز ، كان اكتر واحد بيفرح بالصور دي ويقعد يشير الفيديوهات ، وبعدين يروح كاتب اللهم لاشماته!.

عامه علي طريقة المصريين في موضوع اللهم لاشماته والزيطه حبيت احط صوره بديع هنا كمان

لكي لا ننسي "اقوال مأثوره"

ماذنب النباتات 
هاتولي راجل
موتوا بغيظكم
الشرعيه
رئيس منتخب
سيدنا جبريل بيصلي في رابعه
بشار مات وهرب برا سوريا
قوه عزيمه ايمان
مرسي له شرعيه نبويه و قرآنيه
مرسي رئيس رباني
اجلس والا طبقت عليك اللائحه
تاخد هولز؟
الي هيرش مرسي بالمياه هنرشوا بالدم
مؤامره لاسقاط الرئيس
يريدون قتل المشروع الاسلامي
باسم يوسف يعمل نصير للشواذ
كل الي في الميدان نصاري
المتظاهرين في التحرير بياخدوا ترامدول
VERSUS NOT AGAINST 
DRINK W DRIVING
باسم يوسف احلي من ليلي علوي ولازم يتنقب
الرسول قدم مرسي يصلي في الرؤيه
سواقين التوكتوك
مشروع النهضه
القرض مش حرام
شويه الجرابيع الي في التحرير
حمالات صدر مادونا

يا ***** يا انجاس

لم ***** بتوعك

يا واد يا مؤمن

انت مخسرتش يا دفراوي

مشاركه لا مغالبه
دوقنا حنيتك

بل "تمردك" واشرب مايته

لا اعلم لماذا يتحمس الكثير لحمله " تمرد " وأري البعض يبدي اهتماماً كبيرا لها ، وكأنها هي طوق النجاه للخلاص من حكم الإخوان والدعوه لاجراء انتخابات رئاسيه مبكره.

تمرد لن يكون لها دور مؤثر فالنظام الحالي لن يؤثر فيه حمله لجمع توقيعات ! ، حتي ولو فاق العدد كل التوقعات ،

فنظام مرسي لم يهتز ولم يتأثر عندما قُتل المصريين في احداث كثيره في عهده ، فهل من الممكن ان يحرك ساكنا لو اصبح هناك ١٥ مليون توقيع ؟! ....أشك. 

قانونا : لو وقع كل الشعب المصري فلن يتغير شيئا - يعني التوقيعات دي نبلها ونشرب مايتها -

فالقانون لا يعترف الا بتوكيل موثق في الشهر العقاري واعتقد ان توثيق اكتر من ٥ مليون توكيل في مصر امر صعب وليس بهذه السهوله فماذا لو اردنا ١٥ مليون توكيل ؟.

وجهه نظري ان فكره حمله تمرد ، هي فكره صبيانيه هتخلي الناس تصاب باحباط بعد ماتفشل !.

والناس مش ناقصه احباط ،،،،،

أوجدوا بديل حقيقي او التزموا الصمت.

تعريب العلوم والسكس بلف

ظهرت دعوات كتير لتعريب العلوم ومابين مؤيد ومعارض بتحصل ندوات ولقاءات كتير لكل فريق لعرض وتبادل وجهات النظر
وبعد اقرار الدستور الجديد اصبح لدينا ماده 60 والتي ينص جزء منها علي " تحمى الدولة الوحدة الثقافية والحضارية واللغوية للمجتمع المصري، وتعمل على تعريب العلوم والمعارف. "
وايضا دارت نقاشات عديده في تفسير هذه الماده وعارضها الكثير وانا منهم لعده اسباب لايتسع لنا المجال لذكرها هنا

وبغض النظر عن المقدمه السابقه فانه يجب علي الجميع ان يعلم ان المصريين ليسوا بحاجه الي التعريب لانهم هم انفسهم قاموا بتعريب العديد والعديد من المصطلحات وتعدي الموضوع من تعريب مصطلح الي تشويه

يعني بالصلاه علي النبي كدا مستنوش ولا ماده دستور ولا وجهه نظر مهندس ولادكتور

حاولت اجمع كام كلمه كدا من الي بوظهم الميكانيكه اولا والشعب المصري بعدهم لانهم وافقهم علي الكلام ده ! 

عند الميكانيكي :

carburetor بقي كاربيراتير

cut out بقيت كاتاوت

piston بقي بيستم

Oil seal بقي اوسيل

clutch بقي كليتش

Radiator بقي رادياتير

Gear box بقي درابوكس وفي روايه اخري جيري بوكس "بتعطيش الجيم "

accelerator بقي اكسراتير
distributor بقي اسبراتير 

safety valve بقي سكس بلف!

وطبعا لو عايز تظبط الفرامل هتقوله رجليشلي الفراميل الي هي اصلا جايه من كلمه Regulation 

كل الي لازم تعرفه اننا مش محتاجين تعريب . احنا بنقوم بالواجب

نفسي قبل ماتخرج يا هندسه عين شمس !

اجيب اكل من الكافتيريا
اروح اسئل دكتور علي حاجه ذاكرتها وواقفه قدامي
اتصاحب علي معيد واكلمه وانا بذاكر اسئله في حاجه مش عارفها
افتح مرجع !
اقعد في الجنينه
الدكتور يسئل في حاجه اقوم اجاوب
اقعد في اول بنش واحضر المحاضره كامله
اخش امتحان وانا مخلص مذاكره ومش سايب حاجه
ابقي في الكليه من الساعه ٨
امشي من الكليه الساعه ٧
احل شيت بايدي
اعمل ريبورت من غير ما انقل من ويكيبديا
استنتج المسقط التالت كامل لوحدي
اطلع فاينال انسر صح في مسئله
اذاكر قبل مايبقي عندي كويز
اجيب امتياز في ماده واحده بس !!

فين يا برنس !

فين وعود ال ١٠٠ يوم ،
فين ال ٢٠٠ مليار استثمارات ،
فين اعاده تشكيل التأسيسه ،
فين اعظم دستور عرفته البشريه ،
فين اعاده المحاكمات ،
فين محاكمه قتله الثوار ،
فين طنطاوي ،
فين سامي عنان ،
فين حمدي بدين ،
فين الرويني ،
فين المواطنين الي اعترفوا انهم قبضين فلوس في احداث الاتحاديه ،
فين ال ٥٦٧٣٤ الي في الحاره المزنوقه ،
فين اعضاء جماعتك الي ضربوا وعذبوا الناس عند الاتحاديه ،
فين حق جنودنا في سيناء الي اتقتلوا في رمضان ،
فين حق جيكا والجندي والحسيني ،
فين المسئول عن حادثه قطر البدرشين ،
فين المسئول عن حادثه قطر أسيوط ،،،

ولا اقولك قولي :

فين المليون شجره الي جامعتك قالت هتزرعهم.

"فين الشريعه" ؟!!!!!!!

مرسي الفاشل والشماعه !!

ليه انتخب شخص لما ممكن انتخب مشروع
ده طبعا الكلام الخايب الي الاخوان كانت بتضحك بيه علي الناس ايام الانتخابات.
وكانت وجهه نظر كتير من الاخوان لما تجي تتكلم مع اي معارض لانتخاب مرسي ان
مرسي وراه جماعه هتقدر تساعده علي تنفيذه مشروعه - مشروع النهضه " الفنكوش " -
من اول ما مرسي مسك وبدأ معاه الفشل وبدأ معاه تبرير جماعته ، بدأت الحكايه بأن مرسي مش معاه كل الصلاحيات وان المجلس العسكري منعه من تنفيذ اي قرار ، وبعد ما مرسي شال طنطاوي وعنان ، واستمر الفشل ، وبعدين مرسي اصدر اعلان دستوري لتحصين قرارته بحجه ان المحكمه الدستوريه منعاه من تنفيذ اي حاجه مفيده للبلد وبعد الي حصل قدام الاتحاديه وتمرير الدستور
جه الدور علي ان المعارضه مش مسانداه !!
وان الفشل يتحمل نتيجه المعارضه
وفضلت الشماعه موجوده وجاهزه وتعليق الفشل علي اي شخص من اول ( طنطاوي لتوفيق عكاشه لعبد المجيد محمود لتهاني الجبالي لساويرس لباسم يوسف لوزير الداخليه لمستشارين الرئاسه ولسه القوس مفتوح !!!

الي الاسلاميين : مش هتتعلموا بقي ؟!!

بدون الدخول في تفاصيل قد لا تجدي ولا تفيد . يجب علينا ان نتعلم ان الانسان الذي لا يتعلم مما يحدث حوله ويتعظ فهو انسان جاهل بلا شك !


تقريبا دلوقتي لازم كل اخوانجي او كل اسلامي يعرف ان السياسه حاجه وان الدين حاجه لأن المفروض ان الاخوان والسلفيين متفقين علي مرجعيه اسلاميه واحده ومتفقين علي ضروره تطبيق الشريعه وكل الكلام الي كنا بنسمعه !

ليه الخناقه بقي ؟!!

الخناقه بين الاخوان وحزب النور رغم ان المفروض ان مرجعيتهم واحده وهي المشروع الاسلامي الا ان ظهرت خلافات بينهم

فانا بفكر لو في انتخابات دلوقتي وانا عايز ادخل الجنه انتخب مين فيهم ؟ مين فيهم الصح ومين فيهم الغلط

حزب النور قرر انه يقاطع مليونيه الجماعه الاسلاميه يوم الجمعه الي فاتت " هل ده معناه انه ببيؤيد العنف؟ "

نجي عند السلطه والانتخابات والمناصب. لا ! لا !! , الدين يختفي في ثانيه وممكن توصل اننا نتهم الناس بالباطل !


 مؤسسه الرئاسه اتهمت مستشار الرئيس - المنتمي لحزب النور - بانه بيتسغل منصبه وقررت اقالته (من غير تحقيق او دليل )!

انا فاكر جمله البرادعي " امنحوا الاسلاميين بعض الوقت ليعلموا أن الشعارات وحدها لاتكفي "

ادينا قاعدين نتفرج يا بوب !!

عن عمر محمد مرسي

بغض النظر ان البلد مبقاش فيها حاجه عدله . وان كل حاجه بقيت تجيب شلل , وان ربنا ابتلانا بشويه معاتيه ( مرسي وقنديل ).

بنحاول علي قد مانقدر اننا نتعامل مع الموضوع بطبيعيه - خدنا علي مرسي وقنديل خلاص -.

من اول ما مرسي ظهرلنا ومسك البلد مبقاش هو بس الي ربنا بلانا بيه,

ظهر معانا علي الساحه شخصيه تانيه هي سياده "البغل" / عمر محمد مرسي ,

واكونته علي الفيس بوك . 

تابعت اكونت الشخص ده وحاولت علي قد ما اقدر ان افهم " الدماغ دي بتفكر ازاي " وعرفت ده:

• عمر محمد مرسي خريج كليه التجاره جامعه الزقازيق 

• عمر محمد مرسي واحد مصري ابوه سافر امريكا شويه واتولد هناك وخد الجنسيه عادي ورجع عاش هنا زيه زي اي مصري . في يوم وليله لقي ابوه استبن والناس بتعصر ليمون وتنتخبه وفجأه بقي رئيس جمهوريه ,

• عمر محمد مرسي بينطبق عليه المثل الي بيقول ( كان في جره وطلع لبره )

• عمر محمد مرسي شتم واحد علي صفحته وبيقوله " يا بغل "

• عمر محمد مرسي شخصيه تعملت المحن بكل تفاصيله وبتلاقي ده في كل بوست بيكتبه علي صفحته 

• عمر محمد مرسي بعد ما الناس عرفت فضيحه تعينه في المطار وانه هيقبض 38 الف جنيه بدأ في ممارسه هوايته في المسكنه والمحن وتمثيل دور المتهض علي الفيس بوك , 

السؤال هنا : 

عمر مرسي بيقول ان اتعين زيه زي اي واحد قدم للوظيفه وان مرتبه 900 جنيه . طيب ممكن تقولنا يا عفيف :

خلصت جيشك ولا لسه ؟ " معاك جنسيه تانيه ؟ اها طيب ماشي "

ليه رحت علي مكتب رئيس الشركه علطول ؟ 

ليه وزير الطيران المدني استقبلك ؟

فين الإعلان الي شفته والي قدمت علي اساسه في الوظيفه دي ؟

امتحنت كام امتحان لحد ما اتقبلت؟

ماترد يا "بغل" ؟!!

محاكمه لهشام قنديل بسبب استفزاز وقتل الشعب

كتبت الموضوع ده يوم الجمعه الصبح بس اتمسح بسبب غباء مني , المهم هحاول اكتبه تاني .

دلوقتي مين المفروض الي يحاسب رئيس الوزراء علي فقع مراره الشعب؟ (وقتل الشعب)

بعد تصريحات قنديل الي طلع مصمم ان يفقع المصريين في كل مناسبه وبسبب وبدون سبب . مش لاقي سبب يخلي الاخوان ومرسي مصممين انهم يجددوا الثقه في بعد كل مصيبه تحصل 

حكومه قنديل تحولت من حكومه فاشله عاجزه عند اداء واجبتها والعمل علي تخفيف اعباء الحياه عن المواطنين , الي حكومه بتساهم يوميا في تدهور حال البلد . وصناعه الازمات بدل من تخفيفها . 

في عهد قنديل مش بتتحل المشاكل ولا بتفضل زي ما هي . لا دي بتزيد ! . من اول ما مسك قنديل وظهرت مشكله انقطاع الكهرباء وكانت الحكومه عاجزه عن حلهامن اول ما قنديل مسكها وهي بتخرب . كفايه بقي!

ولا يمكن العيب في مرسي !!!!!!!! وبعدين ظهرت ازمه السولار في مصر وكانت الحكومه عاجزه عن تقديم اي حلول ليها برضوا! 

سيبك بقي من كل الكلام ده . ده كله كلام فاضي يا راجل!!!

نتكلم جد شويه :

قنديل اتسبب في قتل :

19 من المجندين الشباب بقوات الأمن ، وإصابة 117 آخرين في حادثه قطار البدرشين !
اكتر من 50 طفل في حادثه قطار اسيوط !
جابر صلاح الشهير بـ "جيكا " 
، و محمد حسين الشهير بـ " كريستى " 
، و محمد الجندي , 
و الحسيني وغيرهم كتير !

من اول ما قنديل مسكها وهي بتخرب , ,,, 

كفايه بقي !!

كلنا هنلبس

يمكن محدش يشوف الكلام ده عشان لسه ده اول موضوع ليا في البلوج ، ويمكن الكلام الي هقوله هيكون ملوش لازمه او اتقال قبل كدا علي لسان ناس في الشارع او صحفيين في جرنال او سياسيين في التليفزيون ، بس البلد لو فضلت كدا هتغرق بينا كلنا وكلنا هنخسر ،
انا مش مع وجهه النظر الي بتقول سيبوا الاخوان كده وعشان لو فشلوه محدش هينتخبهم تاني ، المشكله مش انهم يفشلوا المشكله ان بلدنا هي ال هتفشل ، وساعتها السيئه هتعم ، الناس هتلوم :-
قيادات الاخوان علي فشلهم في الاداره ووعدهم الي منفذش منها حاجه وانهم كانوا السبب في قتل كتير من المصريين

شباب الاخوان : الناس الوحيده في مصر الي شايفه ان مرسي ليه انجازات.

المعارضه لانها مقدمتش بديل كويس علي ارض الواقع غير الدعوه للتظاهر الي استُغل كتير منها في اعمال بلطجه واعتداء بالخرطوش علي عساكر الامن

التيار الاسلامي : الي قاعد بيسبح بحمد مرسي وبيطبله علي اي حاجه بيعملها ومقتنع ان العالم كله مجتمع علي مرسي لافشال المشروع الاسلامي

يمكن الموضوع ناقص او متقالش فيه حاجات كتير بس لسه اول مره اكتب حاجه ، صباح الفل
..

الرغي والرغي الاخر